'సమస్యా పూరణం' పద్య కవులకు మంచి వినోదమే కాకుండా చక్కని అభ్యాసాన్ని,
చమత్కారయుత సృజన శక్తిని అందిస్తుంది.
ఈ మాసం సమస్య :
" పప్పు కొనబోవుటే పెద్ద తప్పు నేడు ! "
ఈ సమస్యను పరిష్కరించి పూరణ పద్యాన్ని వ్యాఖ్య ద్వారా అందించండి.
మంచి పద్యాలను సమీక్ష చేస్తూ, మరొక టపా మాసాంతంలో అందించబడును.
పూరణకు చివరి తేది : 25 ఆగస్టు 2009
- డా. ఆచార్య ఫణీంద్ర (సంపాదకుడు)
బియ్య మది జూడ నింగితో నెయ్య మందు
రిప్లయితొలగించండికూర గాయలా అర పూట గూడ రావు
ధరల గతి జూడ దడ పుట్టు ధరణి లోన
పప్పు కొనబోవుటే పెద్ద తప్పు నేడు !
పప్పు, చారులు, నంజులు, పచ్చడులును
రిప్లయితొలగించండికమ్మని పెరుగు తోడుగా ఘమ్మని చవు
లూర అతిథికి విందు సలుపుట పాడి!
పప్పు కొనబోవుటే పెద్ద తప్పు నేడు!
హరి గారు !
రిప్లయితొలగించండిఅందంగా పూరించారు. అభినందనలు !
రవి గారు !
పద్యం బాగుంది. అన్వయమే ఇంకాస్త స్పష్టంగా ఉండాలేమో !దయచేసి మరోమారు ప్రయత్నించండి.
పప్పు, చారులు, నంజులు, పచ్చడులును
రిప్లయితొలగించండికమ్మని పెరుగు తోడుగా ఘమ్మని చవు
లూర అతిథికి విందు సలిపిరి నాడు!
పప్పు కొనబోవుటే పెద్ద తప్పు నేడు!
(క్షమించాలి. నేను పద్యాలు కట్టడంలో ఇంకా నేను విద్యార్థినే. కాబట్టి భావం ఇంకా స్పష్టంగా ఎలా చెప్పాలో ఊహించలేకపోతున్నాను.)
రవి గారు !
రిప్లయితొలగించండిముందుగా పద్య రచనలో మీ ఆసక్తికి నా అభినందనలు ! అయితే ...
మీ మొదటి పద్యమే వ్యాకరణరిత్యా సరిగా ఉంది. మీ మార్పు వలన 3వ పాదంలో యతిభంగం అవుతుంది.
నేనన్నది " ధరల పెరుగుదల " ప్రస్తావన చేస్తే గాని, భావం సమన్వయం అవుతుందని. మళ్ళీ ప్రయత్నించండి.
కాని పక్షంలో నేనే సూచిస్తాను. నా ప్రయత్నమల్లా మీరు కొంచం రాణింపు పొందాలని.
'అప్పు చేసినా తినవలె పప్పు కూడు'
రిప్లయితొలగించండిఅన్న సూక్తి ఈనాటికి అంత మయ్యె
అప్పు చేసిన, మరి తీర్చ తరము గాదు
పప్పు కొనబోవుటే పెద్ద తప్పు నేడు !
ఆచార్య గారు, ధన్యవాదాలు.
హరి గారు !
రిప్లయితొలగించండిఈ పద్యం కూడా బాగుంది. అయితే 3వ పాదంలో యతి తప్పింది
" అప్పు చేసిన, మరి తీర్చ నలవి గాదు " అంటే సరిపోతుంది.
ఈ పద్యంలో మీరు చేసిన సమన్వయంలో కొత్తదనం గుభాళించింది.
అభినందనలు !
ఉన్న దంతయు నూడిచి కన్న వారు
రిప్లయితొలగించండిపెళ్ళి జేసి పప్పన్నము పెట్టి యంపు
దురుగ! రెక్కలొచ్చెను పప్పు ధరకు! ఔర!
పప్పు కొనబోవుటే పెద్ద తప్పు నేడు!
(ఎంచేతనో ఇంకా సరిగ్గా భావం రూపుదిద్దుకోవట్లేదు. ఇక చేతులెత్తేశానండి.)
రవి గారు !
రిప్లయితొలగించండిచాలా దగ్గరికి వచ్చేసారు. చిన్న మార్పు చేస్తే చాలు !
" ఉన్నదంతయు నూడిచి కన్నవారు
పెళ్ళి జేసి, పప్పన్నము పెట్టుచుంద్రు !
అది అసాధ్యమయ్యె పెరిగినట్టి ధరకు -
పప్పు కొనబోవుటే పెద్ద తప్పు నేడు ! "
పద్యం బాగా వచ్చింది. అన్వయం బాగా కుదిరింది.
మీ ధార బాగుంది. అభ్యాసం చేస్తూనే ఉండండి. మీకు పద్య రచన పట్టుబడినట్టే !
అభినందనలు ! ALL THE BEST !
రవి గారు !
రిప్లయితొలగించండిమీ ఇంతకు ముందు పద్యాన్ని కూడా భావ సమన్వయం కొరకు ఇలా మార్చవచ్చు.
" పప్పు, చారులు, నంజులు, పచ్చడులను
కమ్మదనము గోరెడి మన కర్మ మేమొ !
కంది పప్పు మూల్య మిపుడు గగన మెక్కె -
పప్పు కొనబోవుటే పెద్ద తప్పు నేడు ! "
మరికొంత కృషి చేయండి. మీరు మంచి పద్యాలు వ్రాయగలరు.
జయోస్తు !
అద్భుతం ఫణీంద్ర గారు! ధన్యవాదాలు!
రిప్లయితొలగించండిఒక్క చిన్న సందేహం.
రిప్లయితొలగించండి"అది అసాధ్యమయ్యె పెరిగినట్టి ధరకు"
ఆ పాదంలో "అ" కు "న" కు యతి ఎలా కుదురుతుంది? కాస్త వివరించగలరా?
రవి గారు,
రిప్లయితొలగించండిపెరిగినట్టి = పెరిగిన + అట్టి
కాబట్టి 'అ' కి, నట్టి లోని 'అ' కి సరిగానే యతి కుదిరింది.
ఆచార్య గారు, సరిచేసినందుకు ధన్యవాదాలు. ఇవి కుడా చూడండి.
ధరలు పెరుగుట సత్యమీ ధరణి లోన
ఉప్పు, పప్పుకు కరువది ఉండదనుచు
తలచి నంతనే పప్పులో తరుగు పడెను
పప్పు కొనబోవుటే పెద్ద తప్పు నేడు !
బ్లాకు చేసిన సరకును బయలు పరచ
నాయ కమ్మన్య 'శేఖరు' నలవి కాదు
పప్పు ధరలెట్లు తగ్గునీ ప్రాంత మందు?
పప్పు కొనబోవుటే పెద్ద తప్పు నేడు !
హరి గారు, సంధి వచ్చినప్పుడు "యతి" నియమం అలా పాటించవచ్చు అన్నమాట. ఇంకొకసారి నియమాలు పూర్తిగా చదివి ఆకళింపు చేసుకుంటాను.
రిప్లయితొలగించండివివరణకు ధన్యవాదాలు.మీ పద్యాలు చమత్కారంగా ఉన్నాయి.
రవి గారు !
రిప్లయితొలగించండి" సంధి వచ్చినపుడు యతి నియమం అలా పాటించవచ్చు అన్నమాట " కాదు.
నిజానికి అలాగే పాటించాలి. అయితే నాతోబాటు చాలామంది కూడా, సంధి తరువాతి రూపంలోని అక్షరానికి కూడ యతి వేస్తుంటాం. ఉదాహరణకు హరిగారి చివరి పద్యం రెండవ పాదంలో
" నాయకమ్మన్య శేఖరు నలవి కాదు " లోలాగా.
దీన్ని " అఖండ యతి " అంటారు. కొందరు పండితులు దీన్ని అంగీకరించరు.
కాని మహాకవి కరుణశ్రీ లాంటి వారే ...
" మానసమందెదో తళుకు మన్నది పుష్ప విలాప కావ్యమై " అని అఖండ యతి వేసారు. కాబట్టి అఖండ యతిని నేను తప్పుగా భావించను.
మీ సందేహం పూర్తిగా నివృత్తి అయిందని భావిస్తున్నాను.
హరి గారు !
రిప్లయితొలగించండిరవి గారి సందేహానికి నేను అందుబాటులో లేనప్పుడు సమాధానమిచ్చినందుకు కృతజ్ఞతలు.
ఇద్దరు సహృదయ కవుల సంభాషణకు నా బ్లాగు వేదిక అయినందుకు ఆనందంగా ఉంది.
మీ మరో రెండు పద్యాలు కూడా బాగున్నాయి.
మీ పద్య రచనలో మంచి ధార, చమత్కృతి ఉన్నాయి. మీరు ఇదివరకే ఏమైనా పద్య కృతులు వ్రాసారో లేదో నాకు తెలియదు. ఒక శతకంతో మీ కృషిని ప్రారంభించండి.
విజయోస్తు !
ఆచార్యా,
రిప్లయితొలగించండిమీ ఆశీర్వాదానికి కృతఙ్ఞతలు. ఎప్పుడో పడవ తరగతిలో పద్యాలు వ్రాయడం నేర్చుకున్న తర్వాత, ఇప్పుడే బ్లాగులలో సమస్యలు పూరించడం. మీ సూచనను తప్పక అమలు పరచడానికి ప్రయత్నిస్తాను.
అయితే దానికన్నా ముందు, మీవంటి వారి సలహాలు స్వీకరిస్తూ మరికొంత సాధన చేయాల్సి ఉంది.
రిప్లయితొలగించండిహరి గారు !
రిప్లయితొలగించండిమనదంతా " కవి కులం ".
ముందుకు పదండి. నేను మీ వెన్నంటి ఉన్నాను.
కంది శంకరయ్య గారు !
రిప్లయితొలగించండిమీరు స్పందించలేదేం ?
క్లిష్టతయొ చమత్కారమో యిష్టవిషయ
రిప్లయితొలగించండివర్ణనంబున్న స్పందించువాఁడ నెపుడొ;
కంది మా యింటిపేరయ్యెఁ గనుక కంది
పప్పు కొనుట తప్పని యెట్టు లొప్పుకొందు?